Տնական սկրաբներ՝ շաքարավազից. 3 բաղադրատոմս. news.am

Բազմաթիվ մաշկաբաններ խորհուրդ են տալիս ժամանակ առ ժամանակ սկրաբներ օգտագործել՝ դեմքի մաշկը մահացած բջիջներից եւ ճարպից մաքրելու համար։ Դեմքը մաքրելու համար անպայման չէ թանկարժեք սկրաբներ գնել. կարելի է դրանք նաեւ տանը պատրաստել՝ օգտագործելով ձեռքի տակ եղածը։

NEWS.am Medicine-ի խմբագրությունը Ձեր ուշադրությանն է ներկայացնում շաքարավազից պատրաստվող սկրաբների 3 բաղադրատոմս.

1. Չոր մաշկի համար

Եթե մաշկը չոր է, փորձեք օգտագործել հետեւյալ սկրաբը. 1 թեյի գդալ շաքարավազը խառնել 1 թեյի գդալ զեյթունի ձեթի հետ, զգուշորեն մերսել դեմքը ստաված խառնուրդով, լվանալ գոլ ջրով եւ խոնավեցնող նրբաքսուկ քսել։

Ձեյթունի ձեթի փոխարեն կարելի է օգտագործել ծիրանի կամ դդմի յուղ։ Հնարավոր է նաեւ օգտագործել 1-1.5 թեյի գդալ փափկեցրած կարագ, ճարպոտ սերուցք կամ թթվասեր։

2. Ճարպոտ մաշկի համար

Ճարպոտ մաշկի դեպքում 1 թեյի գդալ շաքարավազը պետք է խառնել նույն քանակությամբ ցածր յուղայնությամբ թթվասերի հետ։ Թթվասերի փոխարեն կարելի է նաեւ օգտագործել մածուն, կեֆիր կամ ձվի սպիտակուց։

3. Ցանկացած մաշկի համար

Եթե մաշկը խառը տիպի է, կարող եք փորձել հետեւյալ սկրաբը. 3 ճաշի գդալ շաքարավազը խառնել 2 ճաշի գդալ մանրացրած նուշի եւ 3 ճաշի գդալ մանրացրած վարսակի հատիկների հետ։ Այս խառնուրդը կարելի է երկար ժամանակ պահել որեւէ փակ տարայում եւ ժամանակ առ ժամանակ օգտագործել։ Օգտագործելիս վերցնել մոտ 1 թեյի գդալ խառնուրդ, ավելացնել որեւէ ձեթ, յուղ, թթվասեր կամ մածուն եւ ապա ստացված խառնուրդով զգուշորեն մերսել մաշկը։

Այս բաղադրատոմսերում կարելի է օգտագործել ինչպես շագանակագույն եղեգնաշաքար, այնպես էլ սովորական սպիտակ շաքարավազ։ Եթե շաքարը շատ խոշոր է, փորձեք մանրացնել այն։

Հարցեր, պատասխաններ, մեկնաբանություններ